Eg var på TSN 09/10 sin premierekonsert i kveld. Heidundrande flott var det, og som mange (allereie) har sagt før meg; dei kjem utan tvil til å få utrulege ting til å skje!
Her er årets vakre kull
Og her kan de følge dei gjennom året - det skal i alle fall eg :)
Dersom eg nokon gong har vore i tvil om eg skulle få meg dyr når eg blir stor og sterk, er det ikkje spor att av den. Dette er faktisk heilt fantastisk! Den er lang, men verdt det :)
Ha ei god natt
(Dette er nok mest for spesielt interesserte. Kanskje.)
Ting begynner å falle på plass. Etter mykje styr om kva studie, klasse og gruppe eg skulle vere i (mensendieck --> fysio A2, gruppe 4 --> B2, gruppe 8 --> A2, gruppe 3) har eg endeleg fått dette fastsett, og i løpet av i dag fått sjonglert meg mellom fleire ulike klassar og fått med meg alt det obligatoriske eg skulle gjennom denne veka. Og no er eg for alltid ein del av A2, gruppe 3. Deilig.
Elles har eg eigentleg hatt ein litt rar dag. Eg har fått stemt, og gått tidleg heim for å vaske leilegheita. Det tek litt tid å skulle vaske fellesareal i ei leilegheit på 211 m2, men no er det jo 9 veker til neste gong. Veldig greit. Men då dette var gjort, var klokka berre litt over 15. Eg er ikkje vand med å vere heime så tidleg, og eg orka ikkje å gå på trening. Dårleg avgjerdsle. Ettermiddagen utarta seg nemleg svært så frustrerande. Eg var i ein tilstand der eg var utan sidestykke rastlaus, men likevel sliten og tiltakslaus - og på toppen av det heile hadde eg eit hinsides sug etter kaffi og noko "godt attåt". Til slutt kom Tine heim og foreslo at eg skulle ta meg ein tur ut. GODT forslag. Eg tok meg ein tur i nabolaget, og oppdaga ein liten byoase som eg kjenner eg kjem til å kome tilbake til. Utruleg å få ein slik ro midt i byen! Etter dette gjekk eg på butikken og surra rundt meg sjølv, og var noko livstrøtt.
MEN: då eg kom heim, kom plutseleg fire av jentene eg bur med inn på kjøkkenet, og hadde tenkt å få seg litt kvelds. Og så satt vi der med eitt, fem (etter kvart seks) jenter, med brødmat, deilig presskannekaffi og te, (og ein aldri så liten sjokoladebit eg hadde fått med frå butikken) og hadde ein koseleg kvelds med godprat og skikkeleg, skikkeleg godstemning.
Eg ser at eg ikkje klarer å formidle akkurat kor god denne kvelden og kveldsen var, men eg sit att med den same godkjensla eg hadde då vi heime på Hjelmeland hadde kveldsbesøk, og hadde kvelds med serviset som er grått og grønt, som sikkert mange synes er stygt, men som eg synes har ein umåteleg sjarme, og praten var roleg og stille, og ein drakk te og kaffi og åt god kvelds.
Dette seier nok ikkje andre enn meg noko som helst, men det er likevel fint å sitte med denne kjensla, og så er det fint å skrive det ned. Sjølv om det nok er mest for meg...
God natt
God natt.
